NOSTALGIA DIBAWAH PUUN JAMBU BOL. (Betawi Punya Cerita)

Dulu taon 80an di kampung kita masing kaya akan buah- buahan,buah apa ge ada dimarih salah satunya nyeng pernah ada pu-un jambu bol,orang kalo denger ama nyeng namanya jambu bol bawaannya udah celam aja dah,entuh baru denger namanya belon ngiat buahnya nyeng pada manting rembel di batangnya.

Jambu bol bukan buahnya doang nyeng enak daon mudanya go bikin kita celam ngiatnya pengen mutes aja buat kita coel ama garem kita rujak entuh mata nyeng lagi ngriep kebanyakan nonton layar tancep jadi melek lagi ustad nyeng udah getem beud ama kita lantaran orang pada ngaji kita pules jadi kaga getem lagi ngiat kita melek .

Pu-unan jaman dulu kalo nyeng udah bebuah pasti tinggi karena masing alami belon ada nyeng namanya Stek atawa cangkokan, pokoknya entuh puun tumbuh dewek di kebon lantaran entuh buah di makan kampret dan bijinya pada numbuh di mana aja, ngerawatnya nya juga pake cara tetua dulu ,pu-unan biar pada gemuk tinggal diurugin ama lumpur comberan, batangnya pada dimakan uter( ulat kayu) ntuh pu-un dipantekin biar uternya pada mati kesodok ama kayu.

Pu-un jambu bol buahnya rada unik bentiknya rada bulet,begaris garis kaya bola beko entuh nyeng udah gede,buah nyeng masing mricit mah belon ada garis-garis merah nya masing polos rada putih ama ijo doangan . Rasanya dari sepet,asem ampe manis juga ada pait ge ada kalo bijinya kekunyah( wkkwkw) cuman emang metiknya rada ribed,kudu menor semua karena buahnya pada gancetan disodok nyeng merah nyeng pentil ngikut pada manting merutug.

Jaman kampung kita masing banyak pu-un bambu manting greot,entuh nyeng namanya jeramba( jamban) jauhnya ampe puluhan meter dari rumah, karena ngempang di kampung kita adanya cuman di pinggiran kali,comberan nyeng punya masing dikit aer dari sumur dibiarin pada meluyah kekebon,entuh kita tengah malem pengen buang gituan,mana becek abis ujan,ngempang jauh takut kaga nahan ngebrolo di jalan,udah dah akhirnya uwak empuan nganterin kita buat beol di kebon,saking udah kebeletnya kita kaga mikir-mikir lagi langsung nongkrong bae dah.

Lagi asyik ngeden pala kita ketiban ada nyeng jatoh dari atas pas kita ngedangak ternyata entuh buah jambu bol nyeng jatoh diorag kalong , pas entuh baru nyadar dah kalo kita buang anuan di bawah pu-un jambu bol.Pantesan dah entuh pu-unya gemuk ama buahnya rada lebet , entuh orang nyeng rada iseng nyolong jambu jadi rada ogah nyamperin karena pas lagi mo naek entuh pu-un dia nginjek ranjau ampe mlene pas dia raba baunya manting ngambreng, kaga jadi dah entuh orang nyolong jambunya, jadi ilang nafsunya ngiat jambu bol.
‌
Sekarang puun jambu bol asli kampung kita udah jarang dan kaga ada nyeng mao ngelestariin padahal entuh buah rada aneh bentuknya,ada karang mah jambu bol sebrang nyeng bukan asli buah kampung kita, jambu bol kita mah seperti ngilang ditelan masa, anak cucu kita jaman sekarang mah kaga pada kenal pisan romanah ama jambu bol....

Bang Ilok
( Betawi Pinggiran)