Pohon Anu Layu ( Betawi Punya Cerita)

Bocah sekarang boro-boro kenal ama nyeng namanya buah katil layu atawa kalo di kampung kita namanya anu layu,namanya sedikit berbau porno tapi begitulah adanya,kaga tau juga sejarahnya ngapa disebut pu-un gituan,udah ah kalo diceritain jadi ngeres ah.

Buah anu layu mirip ama buah Jamblang warna masing pentil ijo,terus rada merah nah kalo udah mateng atawa basa kita mah kileng warnaya item keunguan,jenis batang pu-un nya kaya pu-un karet rada begetah,daon nya juga ampir mirip,rasa buahnya manis-manis sepet kaya buah salam kalo kaga salah rasa,nyeng merah masing rada sepet, kalo nyeng ijo mah rada tangeh buat di makan kaga enak.

Salah satu buah idekan bocah kalo pulang sekola,kalo abis sekola entuh bocah pada manting umres di bawah pu-un anu layu,ada nyeng naek manggrok,ada nyeng nungguin di bawah ampe ngiler kaga dibagi ama temennya nyeng pada naek,ongkoh nyeng naek orangah nyeng rada koret romanah. Kaga engeh pisan ama temenya nyeng di bawah nyeng pada kekeot giginya, kalo katah entuh pu-un bisa di orang di orag dah tuh ama bocah nyeng di bawah. Tapi bocah nyeng di bawah kaga ke ilangan akal lah entuh tas bocah nyeng lagi naek di acungin bari ngancam kalo kaga dibagi entuh tas mao diceburin di ngempang, lah bocah nyeng lagi naek di ancam kaya begituh mah pada ngeper diprutugin dah entuh buah buat nyeng di bawah.

Dulu deket Sasak jikin,belah belor jembatan ada pu-un nya rada gede,pinggir ngempang. Ntuh pu-un di tebang lantaran kena pelebaran jalan, bures dah entuh pu-un kaga ada nyeng kiatan lagi di kampung ampe karang. Emangah rada susah di cangkok karena begetah dan orang dulu kaga kepikiran kalo entuh pu-un bakal ilang lah jonjon bae romanah kaga mikir ama anak cucunya nyeng sekarang kaga kenal ama pu-un gituan.

Orang sekarang nyari pu-un anu layu bukan mo metik buahnya tapi pada nyari getahnya nyeng kata orang anjir bangat buat mancing atawa nyari bangke kayunya nyeng udah jadi batu,buat dibikin batu cincin,kata orang nyeng pada ngarti begituan getah anu layu nyeng udah jadi batu bisa buat Jimat ..ah au ah kita mah percaya pada nyeng kuasa aja dah soal begituan masing -masing aja yang penting mah entuh pu-un anu layu adalah pu-un langka nyeng kudu dilestariin ,biar bocah ama cucu kita nanti pada kenal ama pu-un gituan.????

Bang ILok

Ketua Yayasan Kebudayaan Orang Bekasi ( KOASI)