Nasi Goreng Betawi

Lagi rame di sosmed ama nyeng namanya kuliner Betawi tempo dulu salah satunya entuh nasi goreng mengkudu nyeng katanya salah satu kuliner masakan Betawi kesukaan orang tua kita dulu.

Baca Juga: Nasi Tangkar Karawang

Tapi kalo di Betawi belah saya mah kon seejeg-ejeg dari kita bocah ampe karang rada setengah tua belon pernah sih ngerasain nyeng begituan, ada juga dulu mah adanya nasi goreng kunyit ama nasi goreng daon mangkokan.

Baca Juga: Di Tinggal Mandi, Motor Raib Di Gondol Maling. Pelaku Terekam CCTV

Nah kalo daon Mengkudu dulu mah biasanya enyak ama baba kita demennya dikukus bikin lalab ama entuh dah digoreng campur ama ikan teri, nah entuh ge daon mengkudunya nyeng rada muda dan sering dipetik buat gituan, kalo nyeng baru dan jarang dibikin gituan rasanya masing rada langu dan pait.

Baca Juga: Anies Baswedan Saat di Singapura yang Menyatakan Dirinya Siap Menjadi Capres 2024

Nah kalo nyeng namanya nasi goreng kunyit ama nasi goreng daon mangkokan mah enyak kita ampe saban ari bikin buat kita pada nyarap, makannya dibungkus pake keraras atawa daon pisang nyeng udah kering.

Baca Juga: Gara-gara Saling Olok Nama Orang Tua, Pelajar SMP Di Lampung Pukul Teman nya Hingga Tewas

Entuh nasi goreng nyeng udah dibungkus ama keraras di emek -emek biar jadi bulet, udah jadi bulet dalam keraras baru dah entuh nasi dibuka dan dimakan, kalo baba kita nyeng kedagar-dagar mo kesawah bae mah biasanya entuh nasi dikantongin di baju pangsi buat dia makan di gubug sawah.

Baca Juga: Kurangi Peredaran Gas Melon, Pemerintah Gencarkan Program Konversi Kompor Gas Ke Kompor Listrik

Dulu mah pan nyeng namanya kunyit ama daon mangkokan tinggal nyari di kebon jadi gampang kaga pake beli apalagi nyeng namanya daon mangkokan ngebelatak selebar batian rumah dan kebon ada, emang pu-un ginian mah pan sokanan buat ditanem di batian atawa di teritipan rumah buat pemantes kalo orang karang mah entuh pu-un gituan dibuat hiasan taman depan rumah.

Baca Juga: Persija Jamu Masura United, Thomas Doll : Semua Pemain Lapar Kemenangan

Cara bikin nasi goreng Kunyit dan nasi goreng daon mangkokan mah gancil tibang cabe ,bawang ama kunyit diuleg ge jadi, kalo nasi goreng mangkokan entuh daon mangkokan di iris kecit -kecit lalu dicemplungin dah di nasi nyeng lagi digoreng tibang begitu doang ge sedep rasanya...

Bang Ilok
Ketua Yayasan Kebudayaan Orang Bekasi ( KOASI)